14 кастрычніка 2026 года дзяржаўнае аб’яднанне «Беларуская чыгунка» і РУП «Белтэлекам» заключылі Пагадненне аб супрацоўніцтве. Подпісы пад дакументам паставілі Начальнік дзяржаўнага аб’яднання «Беларуская чыгунка» Валерый Вярэніч і генеральны дырэктар РУП «Белтэлекам» Аляксандр Кенда.
Пагадненне вызначае доўгачасовае супрацоўніцтва ў галіне павышэння ўзроўню бяспекі руху на чыгуначных пераездах за кошт укаранення дадатковых сістэм бяспекі. Сімвалічна, што яно падпісана ў Год удасканалення тэхналогій работы на Беларускай чыгунцы.
У цяперашні час на палігоне беларускай магістралі эксплуатуецца 66 пераездаў з абмежаванай бачнасцю, якія размешчаны ў крывых участках пуці са абарачэннем цягнікоў з хуткасцю звыш 100 км/г. У сітуацыі, калі на пераездзе знаходзіцца аўтамабіль, сельскагаспадарчая тэхніка альбо іншыя староннія аб’екты ў лакаматыўнай брыгады застаецца крытычна мала часу для прадухілення сутыкнення.
Знізіць рызыкі аварыйных сітуацый магчыма за кошт ранняга выяўлення старонніх аб’ектаў і іншых крытычных падзей на пераездзе. Для гэтага неабходна забяспечыць аўтаматызаваны маніторынг дарожнай абстаноўкі ў зонах гэтых чыгуначных пераездаў.
Папярэдне спецыялісты Беларускай чыгункі прапрацавалі 6 розных тэхналогій кантролю занятасці пераезда і варыянтаў перадачы апавяшчэння ў кабіну лакаматыва, былі вывучаны перадавыя айчынныя і сусветныя распрацоўкі.
Павысіць бяспеку мяркуецца шляхам укаранення сучасных сістэм відэааналітыкі на базе тэхналагічных рашэнняў РУП «Белтэлекам» і тэхнічных сістэм дзяржаўнага аб’яднання «Беларуская чыгунка».
Сістэма бяспекі, якую сумесна рэалізуюць БЧ і Белтэлекам, будзе распазнаваць прысутнасць старонніх аб’ектаў (людзі, жывёлы, транспартныя сродкі) праз камеры відэаназірання і аўтаматычна накіроўваць па цягніковай радыёсувязі паведамленні машыністам, якія знаходзяцца на адлегласці да 3 кіламетраў ад пераезда.
Рэалізацыя гэтага сумеснага праекта намечана на 2027 год.
