РУП «Белтэлекам» у чарговы раз пацвердзіла якасць і надзейнасць сваіх паслуг, калі стала лаўрэатам прэстыжнага нацыянальнага конкурсу «Лепшыя тавары Рэспублікі Беларусь». У намінацыі «Паслугі насельніцтву» перамогу атрымалі два папулярныя рашэнні кампаніі: сэрвіс «Відэакантроль» і пакеты паслуг «ЯСНА».
Конкурс «Лепшыя тавары Рэспублікі Беларусь» праводзіцца штогод з 2002 года па ініцыятыве Дзяржстандарту, аблвыканкамаў і Мінгарвыканкама. Яго ключавыя задачы – павышэнне якасці і канкурэнтаздольнасці айчынных тавараў і паслуг, а таксама дапамога спажыўцам у выбары лепшых прадуктаў. Конкурс праводзіцца ў два этапы: на першым абласныя камісіі вызначаюць тавары-фіналісты, на другім – рэспубліканская конкурсная камісія падводзіць канчатковыя вынікі.
У 2025 годзе вядучыя прадпрыемствы краіны змагаліся за ганаровае званне ў чатырох асноўных намінацыях: прадуктовыя і прамысловыя тавары, прадукцыя вытворча-тэхнічнага назначэння і паслугі насельніцтву. У намінацыі «Паслугі насельніцтву» звання лаўрэата ўдастоены 13 паслуг 11 арганізацый, і ў іх ліку – «Белтэлекам». Асабліва каштоўна тое, што прадпрыемства ўпершыню прыняло ўдзел у конкурсе і адразу ўвайшло ў лік лідэраў.
«Відэакантроль» – гэта сістэма маніторынгу ў рэжыме 24/7. Аддалены доступ да камер праз мабільны дадатак або web-партал, высокая якасць выявы і абароненае воблачнае сховішча даных робяць гэтую паслугу незаменным інструментам на ўсялякіх аб’ектах: ад шматкватэрных або прыватных дамоў да офісных памяшканняў і вытворчых тэрыторый. «Відэакантроль» прапануецца «пад ключ» – ад праектавання да ўстаноўкі абсталявання і тэхнічнай падтрымкі.
Брэнд «ЯСНА» даўно ўжо стаў сінонімам зручнасці для сотняў тысяч беларускіх сем’яў. У лінейцы – шырокі выбар пакетаў паслуг з безлімітным інтэрнэтам, лічбавым тэлебачаннем і тэлефоннай сувяззю. Пры гэтым да трох асноўных паслуг можна дадаць «Відэакантроль», доступ да анлайн-кінатэатраў і іншыя сэрвісы.
Для беларускіх спажыўцоў афіцыйны лагатып конкурсу стаў сімвалам якасці і надзейнасці. На працягу двух гадоў «Белтэлекам» зможа карыстацца гэтым вядомым знакам у сваіх дакументах і рэкламе.
Для кампаніі з 30-гадовай гісторыяй гэтая ўзнагарода – важнае пацвярджэнне правільнага стратэгічнага курсу ў галіне якасці і даступнасці сучасных паслуг. «Белтэлекам» і далей будзе развіваць сваю інфраструктуру і ствараць надзейную лічбавую экасістэму, дзе перадавыя тэхналогіі і рашэнні становяцца даступнымі кожнаму.
Дзякуем усім абанентам за давер! «Белтэлекам» – ваш надзейны праваднік у свеце лічбавых магчымасцяў.
