30 верасня ў Мінску завяршыўся маштабны хакатон Міжнароднага саюза электрасувязі, прысвечаны распрацоўцы інавацыйных рашэнняў на базе штучнага інтэлекту. Мерапрыемства адбылося пры падтрымцы Міністэрства сувязі і інфарматызацыі Беларусі і Беларускай дзяржаўнай акадэміі сувязі. «Белтэлекам» выступіў генеральным партнёрам форуму і падрыхтаваў спецыяльныя прызы для фіналістаў.

Хакатон аб'яднаў студэнтаў і маладых спецыялістаў у галіне IT, дызайну, кіравання прадуктам і аналізу даных. У фінале сустрэліся 18 каманд, да пяці чалавек у кожнай.

– «Белтэлекам» як флагман тэлекамунікацыйнага рынку заўсёды адкрыты ініцыятывам, накіраваным на падтрымку таленавітай моладзі і ўкараненне інавацый. Сёння ІІ – гэта ўжо не фантастычная канцэпцыя, а практычны інструмент, які змяняе многія звыклыя сферы. Мы прапанавалі ўдзельнікам два кейсы – канкрэтныя задачы, рашэнне якіх актуальна для нашай кампаніі. З вялікай цікавасцю азнаёміліся з прэзентацыямі і ўбачылі шмат цікавых праектаў, якія ў будучым могуць быць інтэграваныя ў нашу работу, – падзяліўся ўражаннямі намеснік генеральнага дырэктара па лічбавым развіцці і інфармацыйных тэхналогіях «Белтэлекама» Сяргей Буйніцкі. – Хакатон – гэта не проста спаборніцтва, а ўнікальная пляцоўка для генерацыі новых ідэй, якія прынясуць карысць і кампаніі, і нашым кліентам, і ўсяму грамадству.

На працягу двух дзён удзельнікі працавалі над рэальнымі кейсамі ад арганізацый-партнёраў – шукалі рашэнне пастаўленых задач з выкарыстаннем штучнага інтэлекту. Атмасферу супрацоўніцтва і абмену ведамі падтрымлівалі вопытныя эксперты-ментары, гатовыя прыйсці на дапамогу і даць каштоўныя рэкамендацыі.

Першае месца ў рашэнні кейса для кампаніі «Белтэлекам» заняла каманда з Акадэміі МУС. Другім пераможцам стала каманда Беларускага дзяржаўнага ўніверсітэта, якая распрацавала праект для Wildberries.

Жадаем усім удзельнікам, каб іх рашэнні сталі асновай для будучых паспяховых праектаў!