Сёння «Белтэлекам» прымаў маладзёжны патрыятычны фестываль, цэнтральнай падзеяй якога з'яўлялася акцыя «Мы – грамадзяне Беларусі!».

Усебеларуская ініцыятыва набыла шырокую папулярнасць, стаўшы адной з важных традыцый нашай краіны. Цырымоніі ўручэння пашпартоў юным беларусам праходзяць урачыста і сімвалізуюць першы адказны крок у дарослае жыццё.

У Цэнтры сучасных тэхналогій «Белтэлекама» сустрэліся 70 сталічных школьнікаў ва ўзросце 14 гадоў. Усе хлопцы ініцыятыўныя і таленавітыя, маюць поспехі ў вучобе і творчасці.

Праграма пачалася з займальнай інтэлектуальнай віктарыны, падчас якой ўдзельнікам спатрэбіліся веды школьнай праграмы, логіка, эрудыцыя і кемлівасць. Тут спатрэбіліся і згуртаванасць, і ўменне працаваць у камандзе.

Кульмінацыяй мерапрыемства стала ўрачыстае ўручэнне галоўнага дакумента – пашпарта грамадзяніна Рэспублікі Беларусь. Кіраўнік Адміністрацыі Цэнтральнага раёна сталіцы Мікалай Палякоў цёпла прывітаў хлопчыкаў і дзяўчынак, павіншаваў з Днём Канстытуцыі і такой значнай падзеяй у жыцці кожнага чалавека, як атрыманне пашпарта.

Яркія ўражанні ўсім прысутным падарыла пазнавальная экскурсія па гісторыка-інфармацыйным цэнтры сувязі. Выставачныя залы цэнтра расказваюць пра гісторыю паштовай, тэлеграфнай і тэлефоннай сувязі, радыёсувязі, тэлебачання і інш. Асаблівае месца займае Алея Герояў, якая апавядае пра подзвіг сувязістаў у гады вайны.

Дзяржаўнае свята Дзень Канстытуцыі Рэспублікі Беларусь штогод адзначаецца 15 сакавіка. Асноўны закон вызначае асновы дзяржаўнай улады і грамадскага жыцця, гарантуе асноўныя правы і свабоды грамадзян, вызначае асновы дэмакратычнай сацыяльнай прававой дзяржавы, а таксама з'яўляецца важным фактарам для фармавання грамадзянскай ідэнтычнасці і нацыянальнай самабытнасці беларусаў.

​

​

​

​

​

​