У лютым мабільнаму дадатку «Мой горад» споўнілася тры гады. За гэты час ініцыятыва, рэалізаваная Міністэрствам сувязі і інфарматызацыі сумесна з РУП «Белтэлекам», набыла вялікую папулярнасць. Сёння рэсурсам карыстаецца насельніцтва 45 беларускіх гарадоў, уключаючы два абласныя цэнтры – Магілёў і Віцебск, яшчэ 18 гарадоў рыхтуюцца да запуску.

Міністр сувязі і інфарматызацыі Канстанцін Шульган:

– Дадатак «Мой горад» – гэта маштабны творчы праект, які прадэманстраваў, як лічбавыя тэхналогіі могуць палепшыць якасць жыцця нашых грамадзян, зрабіўшы гарадское асяроддзе больш даступным. Мабільны рэсурс стаў практычным інструментам узаемадзеяння мясцовых жыхароў са ўсімі гарадскімі службамі і сэрвісамі. Я задаволены тым, як дадатак развіваецца ў нашай краіне, рады бачыць новыя гарады і новых актыўных карыстальнікаў. «Мой горад» з'яўляецца ўзорам для іншых праектаў у галіне цыфравізацыі гарадской інфраструктуры.

Мабільны дадатак з простым і зразумелым інтэрфейсам аблічбаваў усю гарадскую экасістэму: свае паслугі прадстаўляюць дзяржаўныя арганізацыі, установы аховы здароўя і адукацыі, аб'екты культуры, гандлю, вольнага часу і іншыя. Тут размяшчаецца даведачная інфармацыя, падзеі, навіны, акцыі, кантакты. Аднак дадатак – гэта не аналаг сайта, яго асаблівасць – магчымасць інтэрактыўнага ўзаемадзеяння. Гараджане могуць запісацца на прыём у выканаўчы камітэт і іншыя дзяржустановы, задаць пытанне і атрымаць адказ, купіць тавар анлайн, замовіць талон у паліклініку або запісаць дзіця ў спартыўную секцыю.

Для кожнага горада ствараецца асобны дадатак з унікальнымі дадзенымі. Яго функцыянал дазваляе таксама пакідаць водгукі і прапановы, што дапамагае паляпшаць якасць паслуг і павялічваць узровень камунікацыі паміж гараджанамі і органамі ўлады.

Пілотны праект стартаваў у 2021 годзе ў Полацку. На сённяшні дзень у лідэрах – Віцебская вобласць, дзе 14 гарадоў ужо працуюць, 10 рыхтуюцца да старту. Па колькасці запамповак першынство належыць Полацку, у якім прыкладанне ўстанавілі больш за 20 тыс. карыстальнікаў.

За тры гады працы ідэя лічбавай камунікацыі атрымала вялікі пазітыўны водгук: 100 тысяч запамповак, 1 мільён праглядаў паслуг, амаль 80 тысяч анлайн-заказаў. Самымі актыўнымі з'яўляюцца жыхары Полацка, Рэчыцы, Бабруйска, Мазыра і Жодзіна.

Па статыстыцы найбольш папулярнымі ў карыстальнікаў сталі анлайн-паслугі гарадскіх адміністрацый, школ, дзіцячых садоў і спартыўных аб'ектаў, сфера паслуг і турызм. Запатрабаваны таксама сэрвісы папярэдняга браніравання. Такім чынам, уся інфраструктура – пад рукой, неабходна толькі ўсталяваць прыкладанне на смартфон.

Ініцыятыва распрацавана ў рамках Дзяржаўнай праграмы «Лічбавае развіццё Беларусі» і накіравана на павышэнне камфорту і якасці жыцця гараджан. Дадатак «Мой горад (Беларусь)» даступны для запампоўкі на Android і iOS.

​