15 чэрвеня ў Дварцы Рэспублікі ўзнагародзілі лаўрэатаў Прэміі Ўрада за дасягненні ў галіне якасці. Кампанія «Белтэлекам» – у ліку пераможцаў! Узнагароды ўручыў Намеснік Прэм'ер-міністра Рэспублікі Беларусь Юрый Назараў.

«Белтэлекам» працуе на рынку амаль 27 гадоў і ўвесь час клапоціцца пра тое, каб сувязь была якаснай і надзейнай, а праца з кліентамі – на самым высокім узроўні. У гэтым годзе прадпрыемства ўдастоена прэстыжнай узнагароды ўжо чацвёрты раз.

Юрый ПЯТРУЧЭНЯ, генеральны дырэктар «Белтэлекама»:

– Хачу падзякаваць кожнага супрацоўніка за каласальную працу! Упэўнены, што нашы сумесныя намаганні па паляпшэнні якасці паслуг па вартасці ацэняць жыхары нашай краіны.

Прэмія Ўрада - найвышэйшая ўзнагарода, якую можа атрымаць арганізацыя за дасягненне значных вынікаў у галіне якасці і канкурэнтаздольнасці аказваемых паслуг, укараненне інавацыйных тэхналогій і сучасных метадаў менеджменту. Званне лаўрэата забяспечвае рэпутацыю надзейнага пастаўшчыка паслуг і адкрывае новыя дзелавыя гарызонты. «Белтэлекам» як лаўрэат Прэміі на працягу 3 гадоў зможа выкарыстоўваць яе эмблему ў дакументацыі і рэкламных матэрыялах.

Віншуем калектыў «Белтэлекама» з гэтай ганаровай узнагародай! Плённая праца, камандны дух, прафесіяналізм і магутнае лідарства – наш шлях да поспеху!